غزللـــــــر سنـی ایـستـیـر
غزللـــــــر سنـی ایـستـیـر
یالنیز سنی من یوخ،بوتون ائللر سنی ایستیر
قوربانین اولوم گل کی کونوللر سنی ایـستـیـر
یول گوزلمه دن گوزلرمیز کوکسو سارالدی
هیجران بویالی گئچمه ده ایللر سنی ایـستـیـر
باغلار تالانیب یوخدو یاشیلیق ایزی ایندی
وار یاز نفسی سنده بو چوللر سنی ایـستـیـر
قویما قوریا یاغ یاغیشیم بیرده گول آچسین
سولقون بو چمنلرده کی گوللر سنی ایـستـیـر
قالقانلار الینده لالا لارآل قانا باتدی
نا حق یئره بیر بویله قتیللر سنی ایـستـیـر
بیلمم نه گوزلیک گوزلیم واردی کی سنده
واردیر نه قدر بوردا گوزللر سنی ایـستـیـر
میضرابی آلاندا اله هر لحظه عاشیقلار
ساز اوسته یانان دویغولو تئللر سنی ایـستـیـر
گل کائناتین فلسفه سین عالمه اورگئت
بو بارده چوخداندی هئگللر سنی ایـستـیـر
قورتار بیزی نامرد فلکین فیرتاناسیندان
بو اولکه ده سوسقون آقا دیللر سنی ایـستـیـر
چات دادینا مظلوملارین ، ای منجی عالم
حاق درگاهینا قوزانان اللر سنی ایـستـیـر
بیر بویله فراقیندا سنین آغلاماق اولماز
گوزلر دولوسی آخمادا سئللر سنی ایـستـیـر
داود سنی وصف ائتمگه عاجیز دی بیلیرسن
سن گورنه گوزل سن کی غزللر سنی ایـستـیـر
